Ağac Əkən Adam

Dəyərli kitablar insanlara güc verən, onlara yol göstərən və vicdanı hərəkətə gətirən kitablardır. Qiymətli əsərlər adətən qəlbi qovuran iztirabdan doğur. Oxuduğunuz əsər yazıçının fikir sancıları ilə yoğrulubsa, o, qəlbinizi mütləq riqqətə gətirəcək. Kitabı yerə qoyar-qoymaz, ürəyinizdən ağac əkmək keçdisə, demək, müəllif məqsədinə çatmışdır. Jiono çəkdiyi iztirabı, təbiətin gələcəyindən keçirdiyi narahatlığı bir qocanın zəhmətini hekayələşdirməklə oxucusuna təqdim edir. Oxucuya hər bir müvəffəqiyyət və xeyirxahlığın kiçik bir addımla, bir tərpənişlə başladığını çatdırır. İnsanın savad, vəzifə və pulla deyil, alicənab və zəhmətkeş olmaqla ucaldığını göstərir. Və buna iki şeyi də əlavə edir: ümid və səbir. Savadsız bir qocanın 30 illik təmənnasız zəhmətinin on minlərlə insana xoşbəxtlik, hektarlarla əraziyə su və bərəkət gətirdiyini göstərir. Və son olaraq oxucuya bunu demək istəyir sanki: "İnsanı dəyərli edən gözəl əməllərdir. Ən dəyərli əməl isə təmənnasızlıq hissi ilə edilən fədakarlıqdır."