RU
Britaniya Kral Nişanını daşıyan Cenet Vinterson “Portağallar
sadəcə meyvə deyil”, “Ehtiras”, “Bədən yazısı”, “Dünya
və digər yerlər”, “İncəsənət (Obyektlər)”, esselər toplusu,
qısa hekayələr, uşaqlar üçün kitablar da daxil olmaqla on
romanın, çoxsaylı digər əsərlərin, ssenarilərin müəllifidir.
O ən yaxşı debüt romana görə Vitbred mükafatına, Con
Levellin Ris Xatirə mükafatına və E. M. Forster mükafatına,
eləcə də Kann film festivalında Prix d’argent adlı xüsusi
mükafata layiq görülüb.
Albalının cinsiyyəti tarix, təxəyyül və zamanın
təbiətini kəşf etmək üçün yaradıcı bir səyahətdir.
On yeddinci əsr İngiltərəsində mövcud olan, həm
də mövcud olmayan fantastik bir dünyada Temzanın
sahilində bir uşaq tapılır. Köpək Qadın çağırılan nəhəng
biri uşağı xilas edərək onu Cordan adlandırır və boynuna
xalta keçirib gəzməyə aparır. Cordan böyüyəndə Qulliver
kimi səyahət edir, lakin sərgüzəştlərində rastlaşdığı
qəribəliklər onun öz ağlının məhsuludur. Bütün dövrlərin
ən qəribə möcüzəsi isə zamandır. Bu mövcuddurmu?
Təbiəti nədir? Nə üçün hər səyahət öz daxilində başqa
səyahətin xətlərini gizlədir?
“Albalının cinsiyyəti” (“Sexing the Cherry”, 1989-cu
il) əsəri Cenetə böyük uğur qazandırmaqla yanaşı, genişsəpkili
müzakirələrə də səbəbiyyət verib. Roman postmodernizm
aspektindən önəmli eksperimentlərlə zəngindir.
Postmodernizmin çoxşaxəli və qeyri-adi məqamlarda,
mətnlərlə istifadəsi əsərə fərqlilik bəxş edir.