Ərini kitab kimi oxu

“Ərini kitab kimi oxu” kitabı ailə münasibətlərindən yumorla bəhs edən, gündəlik həyatdakı “kişi məntiqi”ni oxuculara bədii və eyni zamanda, səmimi dillə təqdim edən əsərdir. Müəllif ər-arvad münasibətlərinə tez-tez rast gəlinən situasiyaları – alış-verişdən uşaqların dərslərinə, qayınana münasibətlərindən ev işlərinə qədər – zarafatla,
bəzən isə şirin istehza ilə təsvir edir. Kitabın əsas məqsədi qadınlara “ərləri anlamaq” üçün
bələdçilik etməkdir. Burada kişilərin susqunluqları, laqeyd görünən davranışları, qısqanclıqları və “tək iş görmə” bacarıqları, əslində, sadə psixoloji ehtiyaclar kimi izah edilir. Müəllif göstərir ki, kişilərin davranışlarının çoxu laqeydlikdən deyil, fərqli düşünmə tərzindən qaynaqlanır. Kitab ər-arvad arasındakı gündəlik kiçik mübahisələri, in-
ciklikləri böyük faciəyə çevirmədən, təbəssüm və anlayışla yoluna qoymağı öyrədir.