Esselər Və Deyimlər

İllər ərzində qeyd dəftərçəmə yazdığım qeydlərin bir qismini, oxucular üçün maraqlı hesab etdiklərimi, "Esselər və Deyimlər” başlığı altında dərc etməyə qərar verdim. Yazıları seçərkən, əsasən müəyyən məna daşıyan, az da olsa yumor ab-havası yaradan qeydlərin üstünlük təşkil etməsi baş prinsip olaraq qəbul edildi. Həyat və düşüncə tərzinin geniş əhatəliliyi bu yazılarda da öz əksini tapıb. Biz onları bilərəkdən sistemsiz şəkildə, mövzulara bölmədən təqdim edirik, çünki həyatın axarı da sistemlərə ayrılmadan davam edir. Yazılar arasında, şübhəsiz ki, zəif görünən və ya şəxsi motivlərə əsaslanan qeydlər də mövcuddur. Bu isə təbii qarşılanmalıdır, çünki bu qeydlər ilkin olaraq yalnız özüm üçün yazılmış, daha sonra isə ictimailəşdirilmişdir. Əgər bu yazılar Sizdə az da olsa xoş ovqat və ya yeni düşüncə tərzi formalaşdırarsa, mətləbimə yetişdiyimi düşünərək razılıq hissi keçirəcəyəm. Kitabçanın hazırlanmasında mənə yardım etmiş Kəmalə Səmədovaya və Ülviyyə İmana dərin təşəkkürümü bildirirəm.