Nağıllar (Oskar Uayld)

Oskar Uayld XIX əsrin sonlarında ingilis ədəbiyyatında öz dəsti-xətti ilə seçilən, xalq arasında böyük hörməti olan, yaradıcılığının çiçəklənən dövründə doğma vətənindən didərgin düşərək ehtiyac içində ölən filosof, yazıçı, dramaturqdur. O.Uayld gözəl şeirlər, komediyalar müəllifidir. 1890-cı ildə yazdığı "Dorian Qreyin portreti" romanı ilə ingilis ədəbiyyatına yeni roman tipi gətirmişdir. Bütün bu janrlarda O.Uayld orijinallığı ilə seçilsə də, ona ən böyük şöhrəti nağılları qazandırmışdır. XIX əsrin axırlarında nağıl? Elm və texnikanın yeni-yeni möcüzələri dövründə oxucunu hansı nağıl möcüzəsi ilə heyrətləndirmək olardı? Lakin O.Uayld heyrətləndirə bildi! İstedadlı yazıçının sehrli qələmində reallıqla əfsanəvilik, tarixiliklə şərtilik qovuşaraq dinamik süjetli, ciddi ictimai mətləbli nağıllara çevrildi.