Səma Elçisi

Kitabda İslam dini və onun banisi Məhəmməd peyğəmbərin həyatından danışılır. İslamın əmələ gəlməsi tarixi, mahiyyəti, yayılması, İslam bayramları, müsəlman məzhəb və təriqətləri haqqında məlumat verilir. İslamın əsasını yaradan Məhəmməd peyğəmbərin tarixini mərhum M.Ə.Talıbov “Nüxbeyi-süpehri”, yəni “Səma elçisi” kitabında qısa surətdə qeydə almışdır. Bu kitabı birinci dəfə o, fars dilində yazmış və hicri 1311-ci il, Miladi 1894-cü ildə İstanbulda nəşr etdirmişdir. Sonralar, o dövrdə rus məktəblərində oxuyan müsəlman tələbələrin İslam tarixi haqqında heç bir dərslikləri olmadığını görüb, öz əsərini fars dilindən rus dilinə tərcümə edərək, “Небесный избранник” adı ilə 1904-cü ildə Qroznı şəhərində nəşr etdirmişdir. Müəllif qeyd edir ki, “mən “Səma Elçisi” kitabını rus dilinə tərcümə etməklə, bir tərəfdən, İslam tarixi ilə maraqlanan ruslara kömək etmiş oluram, digər tərəfdən də, bu kiçik əsərimi müsəlman gənclərinə bir nəsihətnamə kimi bəxş edirəm”. Əsər 1966-ci ildə isə Şamil Nəcəfov tərəfindən Azərbaycan dilinə tərcümə edilmişdir.