İlahi komediya

Homer qədim yunan ədəbiyyatı, Nizami – orta əsr Azərbaycan poeziyası, Şekspir – İntibah dövrü ingilis ədəbiyyatı, Puşkin – rus ədəbiyyatı üçün necə bir simadırsa, Dante də İtaliya ədəbiyyatı üçün elə böyük bir simadır. İtalyan ədəbi dilinin banisi olan böyük şairin yaradıcılığı Avropa ədəbiyyatının inkişafına güclü təsir göstərmişdir. “İlahi komediya” Dante yaradıcılığının zirvəsi sayılır. Yuxuda səyahət formasında yazılmış əsərdə dini təsəvvürlərə görə üç hissədən (“Cəhənnəm”, “Əraf (Təmizlik)”, “Cənnət”) ibarət axirət dünyasına səyahət təsvir edilir. Məcazi, rəmzi ifadə tərzi poemanın bütün cəhətlərində özünü büruzə verir. Xristianlığın əsas müqəddəs ehkamı üqnum ilə əlaqədar 3 rəqəmi və onun müxtəlif hasilləri əsərin quruluşuna, məzmununa ciddi nüfuz etmişdir.