Vadivasal meydanı

Subramaniam Çellappa “Vadivasal meydanı” qürur, qüdrət və qisasın hekayəsidir. Kitabda iki min ildən çox yaşı olan callikattu yarışı təsvir edilir. Bu, adi yarış deyil; insan gücü ilə vəhşi gücün mübarizəsidir. Builki yarışın məxsusiliyi isə Piççinin də iştirak etməsidir. O, uzaq diyardan buraya məhz Kari buğasını – meydanda onlarla insanın qanını axıdan, həm xarici görünüşü, həm də vəhşiliyi ilə gözlərə qorxu, qəlblərə vahimə salan buğanı ram etməyə gəlib. Bu da səbəbsiz deyil: iki il əvvəl onun atası – callikattu yarışının məğlubedilməz iştirakçısı, qarşısına çıxan ən vəhşi buğaları belə məğlub edən Ambuli də Kari buğası ilə mübarizədə ölümcül yaralanaraq qısa müddət sonra həyatını itirmişdi. Bəs Piççi zəmindarın məğlubedilməzliyi ilə öyündüyü Kari buğasına qalib gələ biləcəkmi? Qarşısına çıxanı buynuzuna keçirib havada fırlayan bu vəhşi heyvanın buynuzları arasındakı mükafatı götürə biləcəkmi? Bu kiçikhəcmli əsərdəki həyəcan və insanla vəhşi heyvanın ölümcül mübarizəsi kitabı yarımçıq saxlamağa imkan verməyəcək. “Vadivasal meydanı”nı oxuyarkən siz sanki bir hindli ilə söhbətləşərcəsinə Hindistan mədəniyyəti, inancı, insanları, təfəkkürü, düşüncə və həyat tərzi ilə də yaxından tanış olacaqsınız.