Yatmış gözəl

Biri vardı, biri yoxdu, çox qədim zamanlarda uzaq ölkələrdən birində bir kralla kraliça var idi. Onlar çox mehriban yaşayırdılar. Amma xoşbəxt deyildilər, çünki uşaqları yox idi. Kral sarayındakı adamlar da buna çox üzülürdülər. Axı mehriban kralla kraliçanı hamı çox sevirdi. Ay keçdi, il dolandı, nəhayət, kraliçanın qızı oldu. Özü də, qız nə qız! Dünya gözəli! Hamı çox sevindi. Kralla kraliça isə sevincdən özlərinə yer tapmırdılar. Onlar saraya qonaqlar dəvət etdilər, ziyafət verdilər, hədiyyələr payladılar.