Körpüsalanlar

Körpüsalanlar İlyas Əfəndiyevin yaradıcılığında özünə­məxsus yer tutan və oxucular tərəfindən maraqla oxunan əsərdir. XX əsrin ortalarında dərc olunan bu əsəri Mərkəzi Komitə qadağan edir. Baş qəhrəman Səriyyənin əxlaq qaydalarını pozduğunu və bunun cəmiyyətdə problemlər yaradacağı isə səbəb olaraq göstərilir.
Əsərdə o dövr üçün yeni olan konsepsiyaya – qadın azadlığı və problemləri məsələsinə fərqli baxış bucağı ilə toxunulur. Səriyyə ədəbiyyatımızda meydana gələn yeni qadın obrazlarından biridir. Romanda quruculuq, inkişaf və istehsal əsas fon olaraq qalır. Bu fonda Səriyyənin mürəkkəb daxili dünyası, onu ağuşuna alan qəribə duy­ğular, Adilin düşdüyü çətin vəziyyət və verdiyi reaksiyalar canlı, dolğun təsvirlərlə, koloritli dialoqlara, hərəkətli təhkiyə ilə gücləndirilib oxucuya ötürülür.