Çılğın izdihamdan uzaqda

“Çılğın izdihamdan uzaqda” klassik pastoral sayılır. Burada saf, sadə, zəhmətkeş insanların yaşadığı puritan kənd həyatı sürətlə sənayeləşən, mədəniləşən şəhər mühiti ilə qarşı-qarşıya qoyulur. Müəllif iki mühit arasındakı təzadı daha qabarıq verə bilmək üçün xəyali bir əyalət, kənd mühiti yaradıb. Şəhərdəki qovğalı, çılğın, məğşuş güruhdan uzaq olan bu yerdə evlər dəbdəbəsiz, kilsələr bər-bəzəksiz, insanlar sadədil, münasibətlər səmimidir. Müəllif bu romanda Qabriel Ouk, Batşeba Everdin, Frensis Troy, Vilyam Boldvud kimi güclü, maraqlı xarakterlər yaradıb, onların dəruni təlatümlərini, hisslərini, fərdi cəhətlərini əlvan boyalarla təsvir edib. Həmçinin Tövratdan, İncildən, Zəburdan çoxlu sitat gətirib, hətta süjeti quranda, qəhrəmanlarına adlar seçəndə də bu mənbələrdən istifadə edib. Məsələn, Batşeba Tövratda məşhur personajın adıdır. Qabriel onu Davud peyğəmbərin Batşebanı güddüyü kimi güdmüşdü. Yeri gəlmişkən, Davud yəhudilərin padşahı seçilməzdən qabaq çoban və musiqiçi idi, Qabriel də eləcə. Serjant Troyla Tövratdakı Batşebanın əri Uriya arasında da paralellər aparmaq olar: hər ikisi əsgərdir, Tövratdakı Uriya əcnəbidir, Troyun isə anası fransızdır.