Həyata qayıdış və ya özünəqəsd. Dəlilik və musiqi

Sizə nəql ediləcək hekayə üç dostun bir-birinə qarşı duyduğu qardaşlıq sevgisindən bəhs etməkdədir. Bu elə tərifəlayiq bir sevgidir ki, haqqında eşidən qulaqlar ağla məstlik, ürəyə isə yumşaqlıq yayardı. Hər üç dost bir-birinə qarşı o qədər sədaqətli, birlikdə olanda o dərəcədə gözəgəlimli olurdular ki, onları görənlər canıyanarlıqla mərhəmətli və nəvazişdən alov şölələnən baxışları ilə onları süzməkdən heç bezməz, ətrafa sevinc yaya-yaya və qəlbinin dərinliklərindən gələn həyəcana ram olaraq çöhrəsi təbəssümdən işıqlanardı. Onların şən və qayğısız birgəlikləri qəlblərinə dolan şadlıq və ümid işartılarını hər gün bir az da artırardı. Onların gözlərində yenicə işarmağa başlayan gənclik və həyat eşqi bəxtəvər ömürlərini günü-gündən daha çox al-əlvan rənglərə bürüyər, onları daha xoşxasiyyətli edər, şeylərə qarşı daha səriştəli olmağa çağırardı və fitnə-fəsaddan uzaqlaşmağa, yalan-palan işlər tutmamağa, idbar olan hər şeydən gen gəzməyə meyilləndirərdi. Onlar sonsuz sevgi, əbədi dostluq və sarsılmaz birgəliklərinin himayəsi altında ömür sürərdilər.