Həyy ibn Yəqzan. Quş risaləsi

Kitabda məşhur müsəlman filosofu İbn Sinanın “Həyy ibn Yəqzan” və “Quş risaləsi” adlı fəlsəfi-alleqorik əsərlərinin ilk azərbaycanca tərcüməsi oxuculara təqdim olunur. “Həyy ibn Yəqzan” müsəlman ədəbiyyatında ilk fəlsəfi alleqoriyalardandır və İbn Sinanın əsas fəlsəfi baxışlarını yığcam və rəmzi şəkildə əks edir. Əsər əqli-mənəvi səyahətin mərhələlərindən bəhs edir. Burada məqsəd vücudun bütün mərtəbələrini tanımaqla dünyaların padşahına çatmaq və kamillik dərəcəsinə yetişməkdir. “Quş risaləsi” isə bu əsərin davamı hesab oluna bilər. Risalədə həmin səyahət quşun timsalında reallaşır. “Həyy ibn Yəqzan”ın məlum versiyasından başqa, digər bir versiyası da bu nəşrdə yer alıb. Həmin versiya indiyə kimi heç bir dilə tərcümə olunmamışdı. İbn Sinaya şamil olunan, lakin əsli dövrümüzə qədər çatmamış, “Salaman və Əbsal” əsərinin icmalı isə sonda əlavə olaraq verilib. Həmçinin kitaba İbn Sinaya aid edilən “əl-Ayniyyə” qəsidəsi və bir sıra digər şeir nümunələrinin tərcümələri də daxil edilib.