İnsanın Məna Axtarışı

XX əsrin ən məşhur psixiatrlarından olan Viktor Emil Frankl otuzdan çox dilə tərcümə edilən və on beş milyondan artıq satılan “İnsanın məna axtarışı” kitabında sıraladığı loqoterapiya qanunlarını İkinci Dünya müharibəsi əsnasında ölüm düşərgəsindəki təcrübələri əsasında yazıb. Oxucular Franklın təsvir etdiyi düşərgənin dünyanı daha böyük həbsxana kimi düşünməyə yol açacaq parlaq metafora çevrildiyini anlayacaqlar. Qasset, Haydegger və Sartr yaradıcılığından tanış olan düşüncələr işığında mövcudluğun çətin şərtləri altında mənanı dərk etməyə kömək olacaq prosesdən söz açan Frankl “İnsanı insan edən nədir?” sualına da cavab verməyə çalışır. “Həqiqətən, ehtiyac duyulan məsələ həyata istiqamətlənmiş əsas dəyişiklik idi. Əslində, həyatdan nə gözlədiyimizin əhəmiyyəti olmadığını, əsl vacib olan amilin həyatın bizdən nə gözlədiyi olduğunu öyrənməyimiz, üstəlik ümidsiz insanlara öyrətməyimiz lazım gəlirdi. Yaşamın mənası haqqında sualları bir kənara atmaq, əvəzində həyat tərəfindən hər gün, hər saat sual atəşinə tutulan fərd kimi düşünmək lazım gəlirdi. Cavabımız danışmaq, yaxud meditasiyadan yox, doğru hərəkətdən, doğru həyat formasından ibarət olmalı idi. Bir sözlə, həyat problemlərin doğru həllini tapmaq və hər fərd üçün seçilmiş əbədi vəzifələri yerinə yetirmək məsuliyyətini daşımaq mənasına gəlir”.