Yolda

Cek Keruakın “Yolda” əsəri Bit nəsli hərəkatının ən parlaq nümunəsi və Amerika ədəbiyyatının klassik yol romanıdır. 1951-ci ildə yazılmış əlyazma dəfələrlə naşirlər tərəfindən rədd edilmiş və Keruak romanı 1957-ci ildə “Viking Press” tərəfindən nəşr olunana qədər fəal şəkildə redaktə etmiş və genişləndirmişdir. Roman 1940–1950-ci illərdə ABŞ-də gənc nəslin azadlıq, səyahət və özünüifadə axtarışlarını izləyir. Müəllif özü romanı haqqında belə deyir: “Bu, həqiqətən də, iki katolik dostumun tanrı axtarışı ilə ölkəni gəzməsinin hekayəsidir. Və biz Onu tapdıq. Mən Onu San-Fransiskoda, Market-Stritdə səmada tapdım (həmin iki görüntü), Din isə tanrıya yolboyu yalvardı. Salehlər
üçün başqa yol yoxdur: o, tanrının adı ilə tərləməlidir. Onu tapdıqdan sonra isə əbədi olaraq ilahiliyinə qərq olur və düzünü desəm, artıq bu barədə danışmağa ehtiyac yoxdur... “Yolda”nı yazmaq üç həftə çəkdi. 1951-ci ilin gözəl bir may ayı idi və mən Çelsidə (Manhettenin Aşağı Vest Sayd küçəsində) yaşayırdım. Romanda mən Bit nəslinin mahiyyətini əks etdirirəm”.