Azərbaycan Nəşriyyatları

Azərbaycan nəşriyyatları, Azərbaycan ədəbiyyatı və mədəniyyəti üçün əhəmiyyətli bir rol oynayır. Bu nəşriyyatlar, ədəbiyyat əsərləri, elmi kitablar, incəsənət nəşrləri, tarixi əsərlər və daha bir çox janrda kitabların nəşri üçün fəaliyyət göstərir. 

Əli və Nino Nəşriyyatı – “Əli və Nino” mağazalar şəbəkəsi olmaqla yanaşı, uzun illərdir ki, nəşriyyat kimi də fəaliyyət göstərir. Qanun nəşriyyatı ilə birgə nəşrləri olduqca çoxdur. Bütün “Dünya uşaq ədəbiyyatı” seriyası və “Qırmızı klassiklər”, “Milli klassikamız” seriyalarının nəşri Qanun və “Əli və Nino”nun ortaq nəşrləridir.

“Əli və Nino” nəşriyyatı  klassiklər seriyasında Fyodor Dostoyevski, Lev Tolstoy, Toni Morrison, Anton Çexov, Victor Hugo, Theodore Dreiser, Jane Austen, John Steinbeck, Jack London, İvan Turgenev, Thomas Mann, Aleksandr Puşkin, Charles Dickens, “Azərbaycan klassikləri” seriyasında isə Məmməd Səid Ordubadi, Mikayıl Müşfiq, Cəfər Cabbarlı, İlyas Əfəndiyev, Hüseyn Cavid, Cəlil Məmmədquluzadə, Yusif Vəzir Çəmənzəminli, İsmayıl Şıxlı və digərlərinin əsərlərini çap etmişdir.

Bunlardan əlavə, “Əli və Nino”nun Qanunla birgə olmayan, tək çap etdiyi nəşrlər də vardır. Məsələn, Luiza Heyin təzə kitabları buna misal ola bilər.

Qanun nəşriyyatı – 1995-ci il ildən fəaliyyət göstərir, Nəşriyyat ilk illərdə, əsasən, hüquq ədəbiyyatı nəşr edirdi. Sonralar isə bədii və tərcümə ədəbiyyatının nəşrinə üstünlük vermişdir.

“Qanun” nəşriyyatı bütün sahələrdə: bədii ədəbiyyat, fəlsəfə, tarix, iqtisadiyyat, tibb, coğrafiya, elmi-fantastika, uşaq ədəbiyyatı, din, mətbəx və sağlamlıqla bağlı kitablar nəşr etməklə fəaliyyətini ilbəil genişləndirir.

“Qanun” nəşriyyatı bir çox Nobel mükafatı laureatının: Orhan Pamuk, Herta Müller, J.M.G. Le Clezio, Jose Saramago, Albert Camus və s. ilə yanaşı, Bernhard Schlink, George Orwell, Marc Levy, Paulo Coelho, Dan Brown, Richard Branson, David Eagleman, Yuval Noah Harari, Eckhart Tolle, Salman Rushdie, J.R.R.Tolkien, Rhonda Berne, Stephen Hawking, Franz Kafka kimi dünyaca oxunan yazarların əsərlərini türk, rus, ingilis, alman, fransız dillərindən Azərbaycan dilinə tərcümə etmişdir.

Hazırda ölkənin ən böyük və ən qədim özəl nəşriyyatı hesab olunur. Bütün bestseller kitabların nəşri məhz Qanun nəşriyyatına aiddir.

Teas Press -  2014-cü ildən təsis edilmişdir. Teas Press nəşriyyatı elmi-kütləvi, bədii, tarixi, motivasiya, iqtisadiyyat və bir çox mövzularda kitablar nər edir.

Nəşriyyatın “3 Alma” və “YAY” adlı fərqli, nisbətən kiçik nəşriyyatları da mövcuddur.

3 Alma - TEAS Press Nəşriyyat evi “3 alma” əmtəə nişanı ilə azyaşlı uşaqlar, yeniyetmə və gənclər, eləcə də müəllim və valideynlər üçün bədii və elmi-kütləvi kitablar nəşr edir.

Yay kitab - Əcnəbi müəlliflərin əsərlərinin Azərbaycan dilində nəşr olunmasını təmin edən "YAY" yeni imzaları tanıtmağa, oxucuya yeni kitablar, yeni fikirlər təqdim etməyə çalışır. "YAY" nəşrləri profili ilə 2017-ci ildə yeni kitabların çapına start verib. Məqsəd 16-35 yaş arasındakı oxucular üçün nəzərdə tutulan kitablarla oxucuları tanış etməkdir.

Qədim Qala - Qədim Qala” 2011-ci ildən etibarən fəaliyyətə başlamışdır. Nəşriyyat əsasən tanınmış yazar Rövşən Abdullaoğlunun kitabları ilə məşhurlaşıb. Hazırda nəşriyyat Rövşən Abdullaoğlunun kitabları ilə yanaşı, bir neçə fəlsəfi, dini kitablar da nəşr edir.

Parlaq İmzalar - "Parlaq İmzalar" Nəşriyyatı 2013-cü ildə yaranmışdır. Əsasən dünya ədəbiyyatının bədii, fəlsəfi, psixoloji əsərlərini dilimizə tərcümə edərək çap edir. Geniş çeşiddə dünya klassikası seriyası var. Bundan əlavə, gənc yerli yazarların tanınmasına da təkan verir. Bu məqsədlə xüsusi ATV seriyası var idi.

Hədəf nəşriyyatı - Hədəf Kurslarının ən böyür uğurlarından biri,onun öz dərs vəsaitlərini çap etdirməsi olmuşdur.Bu məqsədlə 2009-cu ildə “Hədəf Nəşrləri” yaranmışdır. Nəşriyyat əsasən uşaqlar üçün dərf vəsaitləri və öyrədici kitablar çap edir.

İzə - 2019-cu ildə fəaliyyətə  başlayan “İZƏ” nəşriyyatı əsasən şagirdlərin təhsil həyatının hər mərhələsi və hər
sahəsinə aid öyrədici kitablar çap edir. Yəni, uşaqlar üçün ana dili, riyaziyyat və s. testlər, saymağı, oxumağı
öyrədən vəsaitlər, məktəbəqədər hazırlıq və s. istiqamətlərdə kitablar İZƏ nəşriyyatında var.

Libra - 2018-ci ildən fəaliyyətə başlayan “Libra kitab” nəşriyyatının məqsədi uşaq ədəbiyyatı sahəsində faydalı və orijinal əsərlər ortaya qoymaqdır. Nəşriyya­tı­mız əsasən uşaqlar və valideynlər üçün kitablar nəşr edir. Librada uşaqlar üçün həm bədii kitablar, həm də öyrədici kitablar var. Nəşriyyat çalışır ki, hazırlanan kitablar uşaqların xəyal dünyasını və biliklərini zənginləşdirsin, onlara gələcək həyatlarında faydalı olsun. Hazırda ümumilikdə 100-ə yaxın kitab nəşr edilib və çapa hazırlanıb.

Mücrü - Mücrü Nəşriyyatı 2019-cu ildən başalayaraq fəaliyyətdədir. Nəşriyyat fəaliyyətə başladığı gündən həm yerli, həm də dünya ədəbiyyatının nəşri ilə məşğul olur. Bura bədii kitablarla yanaşı, uşaq ədəbiyyatı, metodik və akademik nəşrlər aiddir.

“Mücrü” nəşriyyatının ən popular seriyaları:

– “Çoxbilmiş” uşaq seriyası. Seriyada məktəbəqədər yaşdan başlayaraq orta təhsilin yuxarı sinif yaşlarına qədər oxucular üçün metodik və bədii kitabların nəşri həyata keçirilir.

– “Bapbalaca” seriyası. Bu seriyada uşaqlar üçün müxtəlif mövzulu rəngləmələr və nağıllar nəşr edilir.

Azərbaycan nəşriyyatlarının siyahısında bu nəşriyyatlarla yanaşı daha bir neçə kiçik nəşriyyat da var. Bunların sırasında Xan, Alatoran, Bookzone kimi nəşriyyatların adlarını qeyd etmək olar. Xan nəşriyyatının ən tanınmış seriyası “Xatirə ədəbiyyatı” seriyasıdı. Alatoran və Bookzone nəşriyyatları isə əsasən xarici ədəbiyyatın seçilmiş nümunələrini dilimizə tərcümə edərək çap edirlər.