Dinar

“Həyatın gedişatı çox yox, bir balaca başqa məcrada davam etsəydi, indi bu yaşananların heç biri olmayacaqdı...” “Ehtimal oyunları”, xəyalən başqa bir reallığı təsəvvür edərək özünü ovundurmaq – bu sayaq təsəlliverici fikirlər onu kölgə kimi izləyirdi. O, keçmişdən yaxa qurtarmaq üçün zehnində, ruhunda bir axtarışa çıxmışdı: “...Yəni elə bir qüvvə mövcuddurmu keçmişi silə? Unuda bilərsənmi, cəsarətin çatarmı heç nə olmamış kimi yaşamağa, davam etməyə? Tale insanı məğlub edəndə, bu məğlubiyyətlə barışmalıdır, vəssalam. Yaşamağı bacarmadın, barı ölməyi bacar. Demək, mən ölməyi bacarmalıyam?! Necə oldu axı bu yerə çatdım... Mən ki dünya dağılsa belə özümü sevəcəkdim? Hamıdan, hər kəsdən artıq özümü qoruyacaqdım?!”