AZ
Quran 114 surədən, 6236 ayədən ibarətdir. 200 ayəlik "Ali-İmran" surəsi Quranın 3-cü surəsidir. Surədə, ümumilikdə, cəmiyyəti maraqlandıran məsələlərə aydınlıq gətirilir. "Ali-İmran" surəsinin izahlı tərcüməsində Quranı həyatımızdan çıxaran anlayışın əksinə Quranın həyat yolumuz olduğunu, həyatımızın naviqatoru olduğunu birlikdə görəcəyik.
Tarixdə baş vermiş hadisələri tarix kitabı kimi izah etmədiyini, əksinə, həmin hadisədən nəticə çıxarmağı öyrətdiyini öyrənəcəyik. Çünki Quranın məqsədi insandır. İnsanın hər iki dünya səadətidir. Əgər dininin qaydalarına görə yaşadığını iddia edən insan ümumi olaraq xoşbəxt deyilsə, özünü mühakimə etməli, dinini necə yaşadığını sorğulamalıdır.
Quran fiziki qanunlar çərçivəsində yaşayan, zamandan və məkandan asılı olan, savadına uyğun olaraq düşünən insana göndərilmiş mesajdır. Buna görə də insana müraciət edərkən onun xəyal dünyasını, duyğu və hisslərini nəzərə alır. Quran hər dövrün insanına səslənir. Sosial statusundan asılı olmayaraq hər təbəqədən insana müraciət edir.