AZ
“Klodius Bombarnak” əsəri də müəyyən dərəcədə tarixi əsər sayıla bilər, çünki burada təsvir olunan hadisələr artıq çoxdan tarixə qovuşmuşdur, lakin əsasən macəra üslubunda yazılmış bu roman başqa bircəhətdən əhəmiyyətlidir. “Klodius Bombarnak” romanında Jül Vern köhnə qitənin şərq tərəfinə – Rusiyaya, Zaqafqaziyaya və Orta Asiyaya nəzər salmış, bu ölkələrin həyatı ilə əlaqədar olan bəzi hadisələri işıqlandırmışdır.
Əsər yol qeydləri formasında yazılmışdır. Onun qəhrəmanı Tiflisdən başlayaraq Pekinə qədər dəmiryolu ilə səyahət edir, gördüyü yerləri – Gürcüstanı, Azərbaycanı, Xəzər dənizini, Krasnovdskı, Orta Asiyanın bir çox şəhərlərini öz qeydlərində təsvir edir. Jül Vern bu əsərində XIX əsrin axırlarında Zakaspi dəmiryolu xəttinin çəkilməsinə, mühəndis və texniklərin işinə qiymət verir, bunu böyük elmi və mədəni bir hadisə kimi səciyyələndirir.