Misteriyalar

Romanda hadisələr dramatik, son dərəcə gərgin, kəskin psixoloji konfliktlər

və toqquşmalar, anlaşılmaz müəmmalar fonunda baş verir. Surətlərin, xüsusən də

əsərin qəhrəmanı Nagelin hərəkətləri hadisələrin arxasında gizlənir. Yazıçı baş

verənlərin üstünə sirr pərdəsi çəkərək əsəri sətiraltı anlamlar üzərində qura bilib.

O, qarşısına «çağdaş insanın ağılla, düşüncə ilə dərk edilməyən mənəvi həyatını

araşdırmaq» kimi bir vəzifə qoymuşdur. Ona görə də roman qəhrəmanının başına

gələnlər onun qeyri-adi təbiətinə köklənmiş olur. Nagel həyatın özünə misteriya,

şəbih və müəmma kimi yanaşır və bu da onu bədbəxt bir taleyin sonuna aparıb

çıxarır. O, şəxsiyyəti bütöv olan insan deyil, daima və hər yerdə ziddiyyətli

davranır, sevgidə uğursuzluğa düçar olur. Nəhayət ki, gündəlik həyatın boşluğu

onu bezikdirir, Nagel ətraf aləmə bütün marağını itirərək dəlilik həddinə çatır və

axırda da özünü dənizə ataraq intihar yolunu üstün sayır.