Oxuyaq, öyrənək, bilək

Bizi əhatə edən dünya böyük və rəngarəngdir. Bəs məktəbəqədər yaşlı uşağa bu dünyanı necə anlatmaq, onun dünya ilə bağlı təsəvvürlərini necə inkişaf etdirmək, həyatı yaşına uyğun şəkildə uşağa necə izah etmək olar? Bu suallar valideynləri və pedaqoqları çox düşündürür. Təqdim etdiyimiz bu kitab uşaqların ətraf aləmlə tanışlığına böyük imkanlar yaradacaq, onları maraqlı və əyləncəli məşğələlərə cəlb edəcək, uşaqlarda onları əhatə edən əşyalar, təbiət hadisələri ilə bağlı ilkin təsəvvürlər oyadacaq. Kitab sayəsində heyvanlar aləmi, bitkilər, təbiət hadisələri ilə onları tanış edə biləcək, ilk coğrafi bilikləri öyrədəcək, zaman, məkan anlayışlarını izah edəcək, əşyaları təyinatına görə qruplara ayırmalarına imkan yaradacaqsınız. Kitabda yer alan canlı şəkillər və uşaq dünyasına nüfuz edən maraqlı illüstrasiyalar kitabı asanlıqla qavramağına yol açacaq. Kitab üzrə uşaqlarla fərdi və qrup şəklində məşğul olmaq mümkündür. Məşğələlərdən əvvəl uşaqlarda müsbət emosional ovqat yaratmağa çalışın. Əgər uşaq məşğələdən imtina edirsə, təkid etməyin, məşğələni uşaq üçün daha münasib vaxta keçirin. Məşğələ əsnasında uşaqlarda yaranan “niyə?” suallarını mümkün qədər cavabsız saxlamayın. Əminəm ki, kitab ətraf aləmlə tanışlıqda ilkin məlumat bazasının formalaşmasına ciddi təsir edəcək, böyüklərin isə öz sevimli övladları, yaxınları, kiçik qardaş və bacıları ilə unudulmaz anlar yaşamağına şərait yaradacaq. Nəzərə alın ki, bu kitabı tərtib edərkən dünyanın ən peşəkar uşaq psixoloq və pedaqoqlarının təcrübələrindən yararlanmışıq.