Qürbətdə

Bakıda yaşayan Məryəm adlı gənc qız anasının Birləşmiş Ştatlara köçmək qərarına görə mühacirət həyatının burulğanına düşür. O, bir müddət evdən çıxmır, pəncərədən küçəni seyr edərək insanların geyimlərini, əllərində tutduqları qəhvə stəkanlarını və iki mədəniyyət arasındakı fərqləri göstərən saysız-hesabsız detalları izləyir. Amma, nəhayət, gerçəklik Məryəmi rahat mənzilindən çıxmağa, yad bir dünyaya addım atmağa vadar edir. Bu dünya bir tərəfdən valehedici, digər tərəfdən isə anlaşılmaz, bəzən də amansız görünür.  “Qürbətdə” ilk növbədə mühacirət haqqında bir romandır. Bu roman həm də daxili aləmini kəşf etməyə çalışan gənc bir qızın maraqlı həyat hekayəsidir. Mehriban Efendinin öz vətəni ilə bağlı verdiyi incə təsvirlər doğma mühiti tərk etmək məcburiyyətində olan hər kəsin qəlbinə yol tapacaq.