AZ
Əziz incə ruhlu oxucum, səni salamlayır və əlində tutduğun kitabı oxuduğun üçün təşəkkür edirəm. Bilirsən niyə incə ruhlu dedim? Çünki şeirləri yalnız incə ruha malik olan insanlar hiss edə bilirlər. "Hər kitab bir dünyadır və biz hər hansı bir müəllifin kitabını oxuyarkən onu dünyasına daxil oluruq". Sənin əlində tutduğun kitab şeir kitabı olmasına baxmayaraq, hər birimizin keçdiyi həyat yolunda, zaman-zaman başına gəldiyi və gələcəyi hadisələr bu şeirlərdə ifadə olunubdur. Və mən əminəm ki, burda olan şeirlərdən ən az biri sənin xoşuna gələcək. Niyə soruşsan deyərəm ki, insanların dünyası rəngarəngdir.
Həyatda zaman-zaman hər birimiz uğur qazanırıq və bəzilərimizin bu həyatda idealı vardır və mən də o insanlardan biriyəm. Mənim də həyatda ən böyük idealım atamdır. Hələ uşaqkən onu itirməyimə baxmayaraq, onun haqqında gözəl xatirələri onu tanıyan insanlardan duymaq, mənə həmişə güc verib və yol göstəribdir. Əsl insan necə olmalıdır, onu öyrədib. Mən əminəm ki, ömrümün sonunadək də mənə yol göstərəcəkdir. Və mən bu uğurumu mərhum atam Zamanxana həsr edirəm. Ruhun şad olsun, dəyərli atam!