Persepolis

“Persepolis” Mərcan Sətrapi tərəfindən yazılmış və qrafik roman janrında olan məşhur əsərdir. Kitab müəllifin İran İslam İnqilabı dövründəki uşaqlıq və gənclik illərini əks etdirir. Sətrapi öz həyat hekayəsini həm vizual, həm də mətn vasitəsilə oxucuya çatdırır, oxucunu həm tarixi, həm də şəxsi təcrübələrlə tanış edir. Əsərin baş qəhrəmanı solçu baxışlara malik intellektual ailənin yeganə qızıdır. Gənc qızın gözü ilə ölkədə baş verən mürəkkəb siyasi proseslər və insanların bu proseslərin gətirdiyi çətinlikləri dəf etmək üçün göstərdikləri fədakarlıqlar təsvir olunur. Əsərdə ailəsinin Mərcanı Avstriyaya təhsil almağa göndərməsindən, daha sonra Mərcanın Avropadakı həyatı və ənənəvi İran dünyagörüşündən müasir Avropa dünyagörüşünə keçidi haqda bəhs olunur. Əsər İran cəmiyyətindəki siyasi dəyişikliklərin insanların gündəlik həyatına təsirini, fərdi azadlıqların məhdudlaşmasını və ailə bağlarının gücünü təsirli şəkildə göstərir. 2007-ci ildə İran-Fransa istehsalı olan eyni adlı “Persepolis” animasiya filmi nümayiş olunub. Film geniş tamaşaçı sevgisi qazanıb və Kann Film Festivalında münsiflər heyətinin xüsusi mükafatına layiq görülüb.