Haydi

İsveçrəli yazıçı (1827–1901) Yohanna Spiri həm uşaqlar, həm də böyüklər üçün yazılmış bir çox maraqlı əsərlərin müəllifidir. O, sağlığında işıq üzü görən kitablarından əldə edilən bütün qazancı müxtəlif müharibələrdə sağlamlığını itirmiş insanların müalicəsinə bağışlayıb. Y.Spiriyə dünya şöhrəti gətirən əsər isə uşaqlar üçün yazdığı «Haydi» povesti olmuşdur. 1892-ci ildə yazılmış bu əsər əksər xalqların dilinə tərcümə edilib. Povestin baş qəhrəmanı Haydidir. Əsərdə ata-anasını vaxtsız itirən bu qızcığazın başına gələn bir-birindən maraqlı hadisələr sadə, oxunaqlı dillə təsvir olunub. Müəllif Haydinin timsalında uşaqların həyata, təbiətə və insanlara özünəməxsus baxışını oxuculara böyük məharətlə çatdıra bilib.