AZ
Satılsaydı, siz hansı keçmişi alardınız?
Feliks Ventura Anqolada qeyri-adi ticarətlə məşğul olur... O arzulayanlara yeni keçmişlər satır. Evdən çıxmır, çünki albinosdur. Həm zənci, həm də albinos dərisi günün istisinə dözə bilmir... Müştərilər qapısını döyür, istəklərini bildirir, o da onlara arxivindən yeni ailə şəcərəsi təklif edir.
Evin başqa bir sakini daha var. Gözlərdən uzaqda − divarların çatlarında yaşayan və bu evdə baş verənləri yumoristik dillə danışan gekkon... O həm cinayətə şahidlik edən Feliks Ventura, işıq fotoları kolleksiyası yığan sevgilisi Anjela Lusiya, yeni keçmişinin izinə düşən hərbi fotoqraf Joze Buxman və kanalizasiya tunelində yaşayan Edmundu Barata duş Reyşdən danışır, həm də özünün birinci həyatından − bir vaxtlar insan cildində yaşadığı ömründən bəhs edir.
Bu kitabda F.Kafka, Q.Q.Markes, J.M.Kutzee kimi ustadların izlərinə rastlayacaq və bu əsərdən klassik romanlar kimi həzz alacaqsınız. Bu evə girdinizmi, yeni bir keçmişi görəcək və bu yeni keçmiş üzərində qurulan yeni gələcəyin xəyallarını quracaqsınız.
Feliks Venturanın evinə xoş gəlmişsiniz!
Kitab 2007-ci ildə “Independent Foreign Fiction Prize mükafatına layiq görülmüş, süjeti əsasında 2015-ci ildə film çəkilmişdir.
“Kafkanın Qreqor Zamza personajından bəri bu qədər rəğbət görən qeyri-insan təhkiyəçisinə indiyəcən rast gəlməmişəm”.
— Amanda Hopkinson, “The Independent”
“Con Maksvell Kutzee ilə Qabriel Qarsiya Markesi qarışdırsanız, Joze Eduardu Aqualuza alınar: Portuqaliyanın “Nobel”ə növbəti yazıçı namizədi”.
— Alan Kaufman / nasir, memuarist, şair
“Bu kitab Borxesə ehtiram borcudur...
Kitabımda Borxes Luandada bir gekkonun bədənində təkrar təcəssüm edir. Gekkonun xatirələri epizodik olaraq Borxesin həyatı ilə üst-üstə düşür. Yəni Borxesə ikinci bir şans vermək istəmişəm. Kitabımda o bu imkandan maksimum istifadə edir”.
Joze Eduardo Aqualuza