Mən kiməm?

Hər birimizin daxilində zaman-zaman səslənən bir sual var: “Mən kiməm?” Bəzən bu sual sakit bir gecənin dərinliyində, bəzən də gündəlik həyatın tələsində səssizcə qapımızı döyür. Bu sualı eşidən biriləri var – onu ciddi şəkildə fikir süzgəcindən keçirən, araşdıran, öz iç dünyasında

itib-batanlar. Bəziləri isə bu səslə üzləşməmək üçün daim məşğul qalmağa çalışır, çünki cavab bəzən sükutu pozacaq qədər güclü ola bilər.

Bu kitab elə həmin axtarışın içindən doğuldu. Bəzən bir düşüncə, bəzən bir hiss, bəzən də həyatda rastımıza çıxan izaholunmaz bir hadisə bizi düşünməyə sövq edir. Düşünmək isə bir başlanğıcdır. İnsan özü haqqında sorğulamağa başladıqda, təkcə özünü anlamağa çalışır.

Sorğulamaq özünü tanımağın ilk addımıdır. Sual vermək, cavab axtarmaq, təəccüblənmək, qəbul etdiyimizi yenidən nəzərdən keçirtmək – bunlar insanı olduğu yerdən bir addım irəli aparan gücdür. Bu kitabda yer alan düşüncələr bu gücün, bu yolun bir nəticəsidir. Onlar hazır cavablar təqdim etmir. Əksinə, yenidən düşünmək, yenidən baxmaq və bəzən də susaraq iç dünyasında itib-batmaq üçün çağırış edir.

Bu səhifələr vasitəsilə mən sizə nə öyrətməyə çalışıram, nə də bir yol göstərməyə. Sadəcə, istəyirəm, bir sualın izində mənimlə bir yerdə yol gedəsiniz. Ola bilsin, bu səyahət sizə cavab verməsə də, yeni suallar bəxş edəcək. Və bəlkə də, bu suallar sizi öz həqiqətinizə bir addım daha yaxınlaşdıracaq.